Gwaith grŵp a chefnogaeth

Mae ein rhaglen gwaith grŵp chwe wythnos a gyflwynir yn RASASC NW ym Mangor a'r Rhyl yn cynnig lle hamddenol, cefnogol i rai sydd wedi goroesi trais rhywiol ailgysylltu â nhw eu hunain a gydag eraill sy'n deall. Mae pob sesiwn yn canolbwyntio ar adeiladu llesiant trwy dechnegau ymdawelu, hunan-dosturi, a ffyrdd ymarferol o reoli gorbryder. Rydym yn archwilio'r emosiynau cymhleth sy'n aml yn dilyn trawma, gan gynnwys cywilydd ac euogrwydd, ac yn helpu cyfranogwyr i ddeall bod y rhain yn ymatebion dealladwy.   Mae'r sesiynau'n canolbwyntio ar ddeall sut y gall trawma siapio teimladau corfforol, emosiynau a phatrymau ymdopi, gan roi sylw arbennig i gywilydd, gorbryder a dicter. Trwy dechnegau ymdawelu, ymarferion myfyriol, a thrafodaeth hamddenol, mae cyfranogwyr yn dysgu bod eu hymatebion yn ddilys a dealladwy. Mae'r grŵp hefyd yn edrych ar ffiniau - sut i'w deall, eu cryfhau,  a chadw atynt mewn bywyd bob dydd. Trwy gydol y cwrs, mae'r pwyslais ar ddiogelwch, grymuso a'r cryfder a deimlir wrth wella ochr yn ochr ag eraill.

Grŵp Rhieni

Mae ein grŵp rhieni yn RASASC NW yn cynnig rhaglen chwe wythnos strwythuredig sydd wedi'i chynllunio i helpu rhieni i ddeall, cefnogi a gofalu am eu plant a nhw eu hunain yn dilyn cam-drin rhywiol. Ar draws y sesiynau, rydym yn archwilio beth yw cam-drin plant yn rhywiol a'r rhwystrau niferus sy’n gallu atal plant rhag datgelu pryderon, cyn symud i'r effaith ehangach y gall trawma a cham-drin ei chael ar emosiynau, ymddygiad ac ymdeimlad o ddiogelwch person ifanc. Mae rhieni yn cael eu cefnogi i ofalu am eu llesiant eu hunain, gan gydnabod bod gofalu amdanynt eu hunain yn cryfhau eu gallu i ofalu am eu plentyn. Mae'r grŵp hefyd yn darparu gwybodaeth glir, dosturiol am y System Cyfiawnder Troseddol, gan helpu rhieni i deimlo'n fwy hyderus os byddant yn dewis ymgysylltu â hi. Yn y sesiwn olaf, rydym yn canolbwyntio ar berthnasoedd parchus - sut maen nhw'n edrych ac yn teimlo - ac yn dod â'r grŵp i ben mewn ffordd ddiogel, feddylgar. Trwy gydol y rhaglen, mae'r pwyslais ar rymuso, dealltwriaeth, a chreu lle cefnogol lle gall rhieni ddysgu, myfyrio, a theimlo'n llai unig

Grŵp Cerdded

Rydym hefyd yn dechrau grŵp cerdded hamddenol bob mis, a gynhelir bob trydydd dydd Iau o'r mis rhwng 10 a 11am. Mae'n lle hamddenol, heb unrhyw bwysau a gall unrhyw un sy'n gysylltiedig â RASASC NW ddod draw, cael ychydig o awyr iach, a mwynhau cyd-gerdded yn hamddenol ag eraill. Does dim angen ymrwymo i bob mis - mae croeso i bobl ymuno â pha bynnag deithiau cerdded y gallant. Mae'r ffocws yn syml ar gysylltiad, llesiant, a rhoi awr i chi'ch hun anadlu, symud, a theimlo cefnogaeth mewn cwmni da.

Coffi a Chacen

Ymunwch â ni am goffi a chacen mewn lle hamddenol, cyfeillgar ym Mangor neu'r Rhyl.  Mae'r sesiwn galw heibio hamddenol yma’n cynnig cyfle i oedi, cael eich cefn atoch, a chyfle i feddwl amdanoch eich hun ac eraill.  P'un ai a ydych chi am gysylltu, myfyrio, neu gael cyfnod tawel yn eich diwrnod, bydd croeso cynnes i chi.

Mae ein gwasanaeth yn cynnig grwpiau ar wahân i fenywod, dynion a phobl anneuaidd, yn ogystal â grwpiau rhywedd cymysg i'r rhai sy'n teimlo'n fwyaf cyfforddus mewn lle a rennir. Rydym yn gweithio gyda phob person i ddod o hyd i'r grŵp sy'n gweddu orau i'w dewisiadau a'u gallu, fel y gall pawb ymuno mewn ffordd sy'n teimlo'n iawn iddyn nhw.  Nid sesiynau therapi yw ein grwpiau, maen nhw'n lle diogel i gefnogi ei gilydd.

I gael rhagor o wybodaeth am unrhyw un o'r uchod, anfonwch e-bost at training@rasawales.org.uk